1 უმღერეთ უფალს ახალი სიმღერა, რადგან სასწაულები მოიმოქმედა. მისმა მარჯვენამ და მისმა წმიდა მკლავმა მოუტანა მას გამარჯვება.
2 გააცხადა უფალმა ხსნა მისმიერი, ერების თვალწინ გამოავლინა თავისი სიმართლე.
3 გაუხსენა თავისი წყალობა და ერთგულება ისრაელის სახლს. იხილეს დედამიწის კიდეებმა ხსნა ჩვენი ღმერთისა.
4 სიხარულით შეჰყიჟინეთ უფალს, მთელო ქვეყნიერებავ! იმხიარულეთ, სიხარულით შესძახეთ და ქება უმღერეთ.
5 უგალობეთ უფალს ქნარით; ქნარით და გალობის ხმით.
6 საყვირებით და ბუკის ხმით იყიჟინეთ მეფის, უფლის წინაშე.
7 ახმაურდეს ზღვა და სავსება მისი, მსოფლიო და მკვიდრნი მისი.
8 ტაში შემოჰკრან მდინარეებმა, ერთად იგალობონ მთებმა უფლის წინაშე,
9 რადგან მოდის ქვეყნიერების განსაკითხად. სიმართლით განიკითხავს ქვეყნიერებას და ხალხებს - მიუკერძოებლად.