1 შენ მოგიხმობ უფალო, იჩქარე ჩემკენ, ყური მიაპყარ ჩემს ხმას, როცა მოგიხმობ.
2 კეთილსურნელებად იყოს ჩემი ლოცვა შენ წინაშე და ხელთა აღპყრობა - მწუხრის შესაწირად.
3 უფალო, გუშაგი დაუყენე ჩემს პირს, დარაჯი - ჩემს ბაგეებს.
4 არ გადაახვევინო ჩემს გულს ავი სიტყვისკენ, ურჯულო კაცებთან ერთად ბოროტ საქმეთა ჩასადენად, ნუმც მეგემოს მათი ნუგბარიდან.
5 დაე, დამსაჯოს მართალმა - ეს სიკეთე იქნება ჩემთვის; დაე, მამხილოს - ზეთისცხებად იქნება ჩემთვის, მე უარს არ ვიტყვი ამაზე; ჩემი ლოცვა კი ბოროტმოქმედთა წინააღმდეგაა.
6 როცა კლდის კიდეებიდან გადმოყრიან თავიანთ მსაჯულებს, მაშინ მიხვდებიან, რომ ჩემი სიტყვა ჭეშმარიტია.
7 როგორც მხვნელი აფხვიერებს მიწას, ისე მიმოიფანტება ჩვენი ძვლები სამარის ყბაში.
8 რადგან შენკენაა უფალო, ღმერთო ჩემო, თვალები ჩემი, შენში ვპოვე თავშესაფარი; ნუ მისცემ სიკვდილს ჩემს სულს.
9 დამიცავი მათ მიერ დაგებული მახის მარწუხებისგან და სიავის მქმნელთა მიერ დაგებული ხაფანგებისგან.
10 დაე, გაებნენ თავიანთ ბადეებში ბოროტნი, ვიდრე მე გავივლიდე.