1 ცნობილია ღმერთი იუდაში, დიდია მისი სახელი ისრაელში.
2 შალემშია მისი კარავი, ხოლო მისი სავანე სიონშია.
3 იქ დაამტვრია ცეცხლმოკიდებული ისრები, ფარ-ხმალი და საბრძოლო იარაღი.
4 სინათლით კაშკაშებ; ნადავლით სავსე მთებზე დიდებული ხარ.
5 ნადავლად იქცნენ გულმაგრები, ჩათვლიმეს, ჩაეძინათ, მეომრებს ხელებმა უმტყუნეს.
6 ძილქუში დაატყდათ მხედრებსა და ცხენებს, შენი რისხვისგან, ღმერთო იაკობისა.
7 შიშის მომგვრელი ხარ! წინ ვინ დაგიდგება განრისხების ჟამს?
8 ციდან გვაუწყე სამართალი, შეშინდა დედამიწა და გაირინდა;
9 როდესაც აღსდგა ღმერთი განსჯისთვის, ქვეყნიერების ყველა ჩაგრულის დასახსნელად.
10 რადგან კაცთა რისხვა ხოტბას შეგასხამს, რისხვის ნატამალს კი შემოისარტყლავ.
11 აღუთქვით და აღუსრულეთ აღთქმანი უფალს, თქვენ ღმერთს; მის ირგვლივ ყველამ ძღვენი მიართვას საშიშს.
12 მთავართა სულს ის დაამდაბლებს, შიშის ზარს სცემს ამქვეყნიურ მეფეებს.