1 შემიწყალე ღმერთო, შემიწყალე, რადგან შენ მოგენდო ჩემი სული; შენი ფრთების ჩრდილქვეშ შევაფარებ თავს, ვიდრე უბედურება გადაივლიდეს.
2 უზენაეს ღმერთს მოვუხმობ, ღმერთს, რომელიც თავის ზრახვებს აღასრულებს ჩემზე.
3 ზეციდან გამომიგზავნის ხსნას და შეარცხვენს ჩემი გათელვის მსურველს. თავის წყალობასა და ჭეშმარიტებას გამომიგზავნის ღმერთი.
4 ჩემი სული ლომებს შორისაა მოქცეული; ვწევარ მჭამელთა შორის, ადამის ძეთა შორის, რომელთა კბილები მშვილდისრებია, ენა კი ბასრი მახვილი.
5 ამაღლდი ცათა ზემოთ, ღმერთო; მთელს დედამიწაზე იყოს შენი დიდება.
6 ბადე გაამზადეს ჩემთა ფერხთათვის; ჩემი სული მოიდრიკა; წინ ორმო გამითხარეს და თვითონ ჩაცვივდნენ შიგ.
7 მტკიცეა ჩემი გული ღმერთო, მტკიცეა ჩემი გული, გიმღერებ და გიგალობებ.
8 გამოიღვიძე, დიდებავ ჩემო, გამოიღვიძე ჩანგო და ქნარო; გამოვაღვიძებ განთიადს.
9 განგადიდებ ხალხებში უფალო, გიგალობებ ერებში.
10 რადგან შენი სიკეთე ზეცას სწვდება, ღრუბლებამდეა - ჭეშმარიტება შენი.
11 ამაღლდი ცათა ზემოთ ღმერთო; მთელ დედამიწაზე იყოს შენი დიდება.